“I’m asking for forgiveness”
“I’m asking for forgiveness”
September 04, 2019
Sa kanilang harapan sa Beijing noong Agosto 28, binanggit ni Pang. Duterte kay Pang. Xi Jinping ng Tsina, sa unang pagkakataon, ang makasaysayang hatol ng Permanent Court of Arbitration sa The Hague na kumilala sa soberanong karapatan ng ating bansa sa West Philippine Sea at nagbasura sa pag-angkin ng Tsina sa halos kabuuan ng South China Sea. Sinabi ni Xi Jinping na hindi ito kinikilala ng Tsina, at nagkaisa sila na magtutulungan para mapabilis ang pagbalangkas ng pangrehiyong “code of conduct” para mapanatili ang kaayusan sa South China Sea.
Nais kong himayin, sa espasyong ito, ang mga salitang ginamit ni Duterte upang buksan ang paksa ng West Philippine Sea kay Xi Jinping. Ayon kay Presidential Spokesperson Panelo, ito ang sinabi ng Pangulo: “‘I didn’t want to alarm you with what I’m about to raise because of your problem in Hong Kong, which is why I’m asking for forgiveness, but I need to say this because I promised my countrymen.”
Una, “I need to say this because I promised my countrymen.” Ipinahiwatig ni Duterte kay Xi na kung siya lang ang masusunod, hindi niya bubuksan ang paksa ng panghihimasok ng Tsina sa karagatan ng Pilipinas. Napilitan lamang siya. Tunay nga. Malakas ang tulak ng publiko sa Pilipinas, sa harap ng mahabang listahan ng paglabag sa ating soberanong karapatan – mula sa pagtayo ng mga artipisyal na base military, pagwasak sa mga coral reef, pagsagasa ng barkong Tsino sa Gem-Ver 1, at pagtawid ng mga barkong pandigma ng Tsina sa Sibutu Strait nang walang abiso sa gubyerno. (Nagkakamali ang Malacanang kung ipapalagay nitong nakuntento na ang publiko na “binanggit” ni Pang. Duterte ang arbitral ruling kay Xi. )
Pangalawa, “I’m asking for forgiveness.” Sa awit ni Gary Granada, nagpasalamat pa ang “kawawang si Juan” sa kanyang holdaper dahil nagtira ito ng baryang pampasahe. Sa kaso ni Duterte, siya pa ang humingi ng tawad sa pinuno ng bansang umaagaw sa ating karagatan at pumupinsala sa karapatan at kabuhayan ng mga kapwa Pilipino.
Pangatlo, “I didn’t want to alarm you with what I’m about to raise because of your problem in Hong Kong.” Dito masisilip ang taksil na pangangatwiran ni Duterte. Para sa kanya, magkatumbas ang pag-giit ng soberanong karapatan ng Pilipinas sa West Philippine Sea sa malawakang protesta ng mamamayan ng Hong Kong laban sa itinuturing nilang panunupil ng Beijing. Ayaw niya sanang tularan ang Hong Kong, kaya siya humingi ng tawad kay Xi. Tila nakalimutan ni Duterte na teritoryo ng Tsina ang Hong Kong, samantalang soberanong bansa ang Pilipinas.
Sa guni-guni ni Duterte, kaharap ang kanyang amo, probinsya ng Tsina ang Pilipinas; at siya, ang hamak nitong gobernador.